2018/08/08
杜鳳儀
最近有業主朋友發現筆者嘅專欄, 就打電話嚟同我大吐苦水, 話說家居保險、業主保險都買齊, 有事發生咪又幫唔到手, 到底點解會咁嘅？
事源係咁, 喱位業主一共有兩個單位響同一幢大廈, 樓上自住、樓下出租, 有一日個租客打電話俾業主話佢廚房個名貴煮食爐塊玻璃突然爆咗, d玻璃碎到蜘蛛網咁, 整番都嘥藥費, 要求業主立即更換, 業主因為工作關係仲未收工, 咪叫萬能姐姐落樓下視察下乜嘢環境, 探子回報話根據同鄕(租客嘅外傭)講租客太太剛剛生完小孩, 每日要煲薑醋招呼d親友, 煲醋仲鬼死咁重, 可能一放個煲落煮食爐翻熱時跣手，大力咗咪裂曬囉.
啊.....水落石出.....業主咪諗住叫租客自理, 點知租客死口唔認問邊個講？業主咪話你個外傭講, 租客就死撐話個外傭唔識廣東話！我都明, 但係你外傭講印尼話我萬能姐姐識聽嘛太太！囗同鼻拗係無意義的. 跟住業主突然又諗起有買到業主保險, 立即搵保險經紀問, 咁個經紀話唔該出示一下你張租約嚟睇下先, 張租約呢就係地產代理嘅標準租約, 裏面講屋內嘅固定裝置如有損毀就屬於租客負責, 由於租客打死唔認, 業主都無符, 咁經紀又話如果爐具公司能出示到證明係塊玻璃自然爆開都有可能賠到, 業主立即打電話去煤氣公司問下可唔可以出個證明啦, 答案係冇嘅, 因為個爐係入伙時裝的, 距離現在已經超過10年, 好大可能係自然損耗, 業主唯有死死氣換咗佢囉.
一般家俬電器或者固定裝置如果因為老化/天然損耗而需要更換, 無論你係買咗家居保險/業主保險, 基本上都列入不保範圍的, 並非保險公司有買冇賠, 如果咁都有得賠嘅, 應該冇人會開保險公司喇.
業主朋友聽完之後就話.....啊.....原來係咁.....所以如果閣下有機會遇到朋友講買咗保險冇得賠的話，敬請用心聆聽一下事情嘅真相至好下判斷.
（文章內容純屬作家個人意見，並不代表本網頁立場）
贊助
