有老友同我講，美國聯儲局今次應該加息壓通脹，抑或減息救銀行，真係好似沙士比亞所講，To be or not to be？我認為今次有兩個主題，不是生存抑或毁滅，而是一死一生，就算用到大文豪的說話，都唔係幾正確，不如聽吓一個寡婦的心底話。
話說有一個女人剛剛死了老公，佢老公條屍仍然放在靈堂，聽到外面有人叫賣禾蟲，於是連喪服都唔脫就走去買禾蟲，有親友話佢失禮，寡婦話「夫死夫還在，禾蟲過造恨唔返」，親友無話可說。
美聯儲主席鮑威爾現在是否面對應該繼續加息壓通脹的問題，如果係，當然可以用To be or not to be ，但現在是繼續加息壓通脹抑或減息救銀行，是有兩個主題，用To be or not to be唔係幾貼題，應該好似上述的寡婦話「加息通脹仍在，銀行執笠救唔番」，所以，減息是最正確做法。
現在美國通脹率6%，美聯儲的目標是2%，就算每次議息後通脹降低0.5個百分點，都要經歷8次議息，大約到明年今日才可以達到目標，試問屆時有幾多美國銀行已經執笠，我相信數都數唔晒。雖然有人話，美國有5000家銀行，執300、500家都冇問題，如果有這個想法就大件事，其實只要執多幾家，美國銀行系統就會崩潰，冇人會信美國銀行，咁就大件事。事實上就算美國加息，都未必可以將通脹壓落去，既然不一定成功的事，點解一定要做。
倘聯儲局暴力減息 銀行或能逃出生天
有人會質疑，減息是否可以救銀行？老實說，世事無絕對，不過機會很大，因為現在出事的美國銀行都是買了很多低息美債，在美聯儲暴力加息之下，那些美債虧損甚大，如果美聯儲暴力減息，那些銀行可以逃出生天。如果美聯儲唔想減息，又想救銀行，都有一個不可行的辦法，就是以面值回購所有低息美債，既然早知道是不可行，不如積極考慮暴力減息，正是即使加息通脹仍在，銀行執笠就救唔番。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
