2023/03/09
湯文亮
數月前我去了一家名店食飯，原因是知道那名主管另有高就，順便攞他的新卡片，誰不知那名主管話十畫都未有一撇，仲希望我要繼續幫襯那一家名店。老實說，我幫襯只是因為那名主管，因為每次食飯他都跟得很足，試過幾次主管不在，食物與服務水平差了很多。既然唔想講新店的名字，我亦無謂強人所難。
幾個月之後，那名主管打電話給我話已經去了新店工作了一段時間，我以為一定是上晒軌道才叫我去幫襯。原來我搞錯了，主管話知道佢離開之後，舊店的生意一定會差很遠，如果畀舊老闆知道在離開之前猛派卡片畀熟客，雖然在法律上沒有責任，但在行頭的聲譽始終唔係幾好，幾個月之後就唔同，舊店亦搵到好手打理，生意亦可以保持，所以他才夠膽叫熟客幫襯新店。
有一些人情世故的事，老一輩的人才懂得處理。有時候就算當事人識做，亦會被人誤會，周大福（1929）老臣子離職，本來是日出日落，閒過立秋的事，但不幸周大福股價大跌。其實，近日除了電視廣播（TVB）（0511）之外，很多股票都大跌，但報章話老臣子一宣布離開，周大福市值蒸發了100億元，傳媒的意思是確認老臣子非常值錢。但傳媒有時會幫倒忙，老闆睇到一定唔會開心。老實說，做得這一個位置，一定面面俱圓，唔會講舊公司閒話以及撬走其他工作人員及客戶，因為行頭很細，無謂搞到舊老闆唔開心，正是今日留一線，他日好相見。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
