2023/03/06
湯文亮
星期六早上，有內地老友到公司搵我，佢話今早坐的士前來時，落車時司機提醒他要攞走晒他的物品，佢多謝那名司機，但司機話他並不是做好心，不用多謝。
那名司機解釋，這是怕萬一客人留低電話等物品，又從司機資料到搵到佢，而公司又要佢送返個電話畀客人，本來是冇問題，因為大多數客人會有一千幾百小費，當跑一轉長途。不過，近日有內地網紅報道香港司機太貪心，送返個電話畀佢要收500元，所以，他們一班司機大家講定，最多在客人落車時提醒攞走所有物品，如果仍然有遺留，寧願掉咗去都唔會交畀客人，費事畀內地人話香港人貪心。
的士司機寧願丟掉失物 免被人指貪心
現在網紅為了點擊率已經是無所不用其極，遺失電話只是有心人裝無心人，我相信那名發出視頻網紅已經試了很多次，最壞的只是有一名司機要收500元小費，估計會有幾名司機沒有收錢，但網紅並沒有報道，這比以偏概全還要偏激，但網紅唔知道，她的報道令以後遺失了電話的內地人很麻煩，真正的壞心做壞事。
公道講一句，無論在香港或者全世界任何地方，如果遺失了電話，只要用500元就可以搵得番，我相信問十個人，十個人都願意，就算話司機很貪心的人都很願意。
所以，網紅指摘其實是讚美香港，所以，如果網紅在視頻中講，大家在香港不用太擔心遺失電話，只要500元小費，有很大機會可以搵得返，咁樣講香港的士司機就唔會掉咗個客電話，大家嚟香港玩就放心得多。
最後老友話，又不能夠全部怪罪網紅，若果不是香港人自己睇小自己，網紅又點夠膽睇小香港人。今次老友講得冇錯，我亦無話可說。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
