2023/02/20
湯文亮
星期日早上，收到一個年輕朋友短訊，多謝我的提點，他在英國搵到一份非常合心水的工，估計要等「5+1」之後才會返香港。年輕朋友大約一年前用BNO去了英國，臨離開之前問我有什麼指示，我當時話，指示唔敢講，但去到英國之後，千祈唔好「嗱嗱臨」去搵工做工，應該先休息一下，慢慢搵，唔合適千祈唔好做，除非他的財務未能許可，但據我所知，年輕朋友沒有這個問題，他去英國只是陪小朋友入學，安定之後或者會返香港，或者等「5+1」，所以他是有能力唔做工。
年輕朋友話我的講法與其他長輩不同，當中有不少叫他騎牛搵馬，什麼工也做住先，融入當地社會。
我話年輕人的長輩應該未在外國住過一段時間，如果什麼工也做，連倉務員、外賣小哥都做，又怎可以融入當地社會，甚至以後頻頻撲撲就過了一生，既然財務冇問題，點解唔慢慢搵工。况且那些工作又唔會搵好多錢，如果將自己推向低端行業，很難再向上爬；不過，最緊要都是要有錢，如果冇錢就乜都要做。
推自己向低端行業 很難再上流
其實，很多人都沒有留意，無論移民或者大學畢業之後搵工，都切忌騎牛搵馬，因為很難轉工，所以，有不少大學生在畢業之後去旅行，然後慢慢搵工。
不過，這樣的做法亦有期限，一定要在下一批大學生畢業之前就要搵到工，否則以後很難搵到好工。
第一次買樓也是一樣，不少非常心急買樓的初次置業者，在首置時買了納米樓，浪費了自己的配額，現在面對地產商以較優惠價錢推出較大的單位，實在非常後悔，如果當日沒有買納米樓，今日就可以很輕鬆買一個較大單位。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
