《爭提高債務上限美國做戲做全套》

投資心得

2023/02/17 湯文亮

我在初出道時，曾經代表公司問外資銀行借錢，非常困難，不但查家宅，仲要簽私人擔保，但見到有一些公司問外資借錢不但很容易，不用簽私人擔保，而且要外資銀行答應借錢才會攞份貸款合約畀老闆考慮，結果是他們可以借到錢，我反而借唔到。後來我了解到這是一個故弄玄虛，被動變成主動的借錢手法，而且後着甚高，當冇錢還被銀行追數時，反而可以大聲夾惡話當日冇要求借錢，是銀行主動借錢給他們，不用還！

有人不明白，美國債務已經到達頂點，超過31萬億美元，如果唔提高上限，美國政府就要停擺，但點解共和黨仲要阻住晒，唔肯提高債務上限，唔通真係要美國政府停擺以及國債違約？點解唔立刻提高債務上限，令美國可以發更多國債，不但美國政府不用停擺，並且可以用新國債回購以往已發的國債。

不是你唔買是我未批准你買

正所謂「橋唔怕舊，最緊要受」，美國發債即是向全世界人借錢，美國政府借錢都借得有「吉士」，唔係全世界話買美債，美國政府就要賣，仲要等由共和黨控制的衆議院通過才可以賣。大家唔好咁心急，請等多一陣，現在總統拜登仲叫咗聯儲局副主席布雷納德入白宮協助解決提高債務上限問題，估計最後可以說服眾議院議長麥卡錫，真係做戲做全套，唔使幾耐，美國就會宣布提高債務上限，是一個很難得機會，大家一定要踴躍購買。

其實，條橋已經舊舊哋，有多少失效，如果美國政府唔擔保在任何情况下，都不會沒收任何國籍人士持有的美債，銷路仍然是麻麻；不過，美國不會話畀大家知銷路麻麻，而是美國政府仍然爭取提高債務上限，不是你唔買，而是我仍未批准你買。