2023/02/14
湯文亮
】上星期有老友問領展五供一，七折，應唔應該供，我話點解唔供，如果老友唔供，我替佢供，多多都殺。老友問我點解咁有信心，這不是信心問題，而是折扣問題，我用七折大約44元替老友供股，50元賣走，每股即時賺8元，好過揸支槍去打劫，况且仲係合法。老友話佢自己一定供股，但會請我食餐勁。
老友又問，領展點解會搞到今時今日，要大幅折讓供股，老友這條問題，股票專家唔會回答，只有我這些半桶水地產評論員才會回答，領展名義上是REIT，實際上是PIT（Property Investment Trust），而REIT與PIT究竟有什麼分別，地產行業的人知道，REIT好似收租佬，而PIT就好似投資者，甚至是炒家。
名義上REIT 實際似炒家的PIT
政府當初出售公共產業給領展，當時叫領匯的時候，希望領匯可以做一個收租佬，將政府售予領匯的各屋邨商場優化，停車場收費維持在低水平，這是REIT的做法，但可惜領展不安分，拆售部分公共屋邨商場、舖位，甚至停車場，最弊又唔知價，有炒家買入之後，只是拆售停車位已經夠錢成交，當時引為一時佳話。
過去的已經過去，出售資產亦停止，但最唔明白在疫情嚴重的時候，無論投資者或者個別單位業主，都唔敢買物業，寧願留多個錢傍身，但領展唔知點解咁勇猛，四出收購各地資產，大部分是商場，疫情對商場打擊最大，令到收購項目租金收入減少，而利息又節節上升，導致今次要五供一，焗各位股票持有人供股。
老實說，供股一定可以全額完成，但領展股票暫時必定會大受影響，未來可能會回升，但各位領展股票持有人就做不成君子，因為吃了眼前虧。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
