2023/02/06
湯文亮
周日去街市買魚，魚檔老闆話，經常聽到啲玄學家講風水，現在香港的「水運」來了，但又唔見到有玄學家提及。老闆見到我面上有一個問號，立刻繼續解釋，近日香港附近水域，水質靚到不得了，什麼靚魚也可以釣到，忘不了當然是例外，因為是淡水魚，最奇怪的就是唔死唔知道是靚魚的黃勒石班，黃勒要死咗班紋才會出現，現在也可以隨時搵到，而其他靚魚亦多到不得了。
漁民知道，如果香港冇運，一定唔會有咁多靚魚聚集在香港水域，老闆說得對，人才也是一樣。
如果一個遊客到了香港，唔覺意走到任何一個街市，包括一些屋邨街市，他會發覺香港有冇搞錯，街市有魚賣唔出奇，但有咁多游水靚魚賣就很出奇，代表香港整體市民的消費力都很高，不是集中在某些高消費力街市，魚檔老闆話，香港又點會衰？
正當魚檔老闆準備劏一條黃勒給我的時候，有名廚到來買魚，名廚話星期一通關，有大量晚飯訂單，要買定多些靚海魚，雖然內地都有得賣，一來價錢較貴，二來通關之後來香港旅行的內地人士，消費力都比較好，所以，一定要準備多些靚海魚。
名廚問我是否了解什麼是「水運」，我真的唔識，問是否海納百川，名廚話水是君子，可以接納不同密度液體，例如將一碗油倒入一鑊熱水之中是不會被排斥，反之將一碗水倒入一鑊熱油，一定會彈到周圍都係，所以，油是小人。
在世界形勢，中國好似水一樣，可以接納任何一個與其他國家交往，包括美國等國家，但美國很多時都要求盟國舉起反中大旗，否則就會被排斥，不能進入美國陣營，特性與油相似，如果中國行「水運」都唔錯。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
