2023/02/01
湯文亮
星期一有不少人同我講，除了老C轉軚之外，仲有一個股市KOL，在恒指萬五點的時候話香港股市還須終極一跌，但到昨日就話恒指可以去到3萬點，真的是很難捉摸。老C則轉軚話樓市將會作出U形反彈，至於以前話樓市仍未到最壞時間，已經好似唔記得，問我有何評價？
其實，股市預測、樓市預測，只是一個預測，信則有，不信則無。至於股市KOL與老C點解會轉軚，其實有什麼稀奇，晉陶淵明亦轉軚，佢話「實迷途其未遠，覺今是而昨非」，就是轉軚，轉軚轉得快就是正確。不過，陶潛哥轉軚就轉得比較文縐縐一些，轉咗都唔知。
年三十罕錄多宗成交 部分漲價15%
至於老C點解會轉軚，很簡單，就是老C揸住一些不是一般人知道的數據，我都唔知道可不可以寫出來。一般來說，在年三十晚，是不會有樓宇成交，但今年唔同，竟然有幾十單成交。老實說，一般業主都唔想在年三十晚賣樓，除非價錢比較高。到昨日，我們發覺，有不少成交價竟然漲幅達15%，如果我係老C，見到有咁嘅情况，都會轉軚。
除此之外，做物業代理最希望的是可以在一個已出售的物業做多一轉，所以，近日在不少臨時合約，都不會將「Subject to Contract」crossed out，代表業主可以賠訂重售，結果又會令樓價上升。單是這兩個信息，就可以令到一個資深物業代理轉軚，如果仲唔識轉軚，唯有轉工。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
