2023/01/16
湯文亮
有人話好彩在踏入2023年之後，樓市出現反彈，否則我一定會俾人笑我是樓市最傻的人，如果唔係，點可能全香港的評論員都講樓市跌，只有我講樓市會升，而且樓市上升的理由是中港通關，因為在通關之後有不少國內人到香港買樓，而事實上，不少業界人士都認為在通關之後，大量國內業主到香港賣樓，樓價又點會唔跌。
老實說，好不容易等到通關，情况又的確好似我咁講，在通關之後，甚至未出現大量國內買家到香港之前，不少急於賣樓的業主已立刻反價，甚至封盤不賣，與此同時，又唔見到有大量業主衝落嚟香港賣樓。
有老友話，情况咁明顯，點解有人話在通關之後，樓市會因為有大量國內業主衝落嚟香港賣樓而大冧，那些人是不是傻的。
以為通關後樓價跌 賣自住樓
老友可能不明白，那些話通關之後樓市會大冧的人不但不是傻仔，而且非常精叻，不過，大多數不是業主，他們講通關之後樓市會大冧只不過是想嚇下有樓的朋友，並無惡意，他們的朋友亦會明白，那些人都冇樓，當然希望樓價下跌，根本無傷大雅，亦不值得介懷。
有一些是為了搵食，以通關後樓市會大冧為理由，希望有業主相信他們而賣樓，就可以從中得到佣金，亦不能怪責他們，都是嗰句說話，只不過是搵食嗟，所以，他們點會是樓市最傻的人。
不過，有人講得出，就自然有人會相信，雖然為數不多，但的確有人相信在通關之後樓價會大冧．在沒有迫切性的情况下將自住單位賣走，仲要加強語氣同其他人講通關之後樓市會大冧，他們才是樓市最傻的人，不過，牛唔飲水不能夠將牛頭撳低，他們亦不能怪任何人。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
