2023/01/05
湯文亮
在踏入新的一年之後，樓市表現好似反轉，不但不少業主封盤反價，亦有不少之前話樓市大跌的人轉口風，其中一個分析員話，他在去年11月已經知道中央政府放寬抗疫政策，佢仍然話樓市會下跌，不過是希望業主劈價賣樓，他可以執平貨。如果他的說話是真的，我覺得他有失分析員身分，如果我係那位分析員，打死都唔會話預測樓市下跌只因為想執平貨。
由於樓市形勢有變，我打算寫一篇「賠訂重售，會不會變成新常態？」後來發覺，原來在去年11月，已經有業主成功賠訂重售，在短短兩個月，業主賣貴14 ％，但很可惜，事情已經發生兩個月，傳媒隻字不提，只集中報道那些劈價蝕讓，中原指數如何江河日下，去年在幾乎無風無險之下，下跌了15%。老實說，我到現在都唔知點解，但事實勝於雄辯，無謂死雞撐飯蓋，但最奇怪就是那位業主明知樓市下跌，仍然賠訂重售，究竟他是對樓市回復信心，抑或發覺自己中了伏，賣了樓之後才發覺，賣走的單位樓價根本買唔番一個相若的單位，就算賠訂都有着數。
如果樓市在1月份升得太急，賠訂重售將會變成新常態，所以，即使用低價買到樓的人都唔好開心得咁早，因為業主隨時會賠訂重售，雖然賺了少少訂金，但可能失去一次抓住樓市上升的機會，可能得不償失，並不是捉到鹿唔識脫角，而是捉到鹿脫唔到角。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
