2022/12/28
湯文亮
有老友同我講，老C有冇搞錯，樓市如此淡靜，公司蝕錢蝕到要炒一半人，現在仲要出花紅，究竟點解。
老友唔明白，老C雖然是讀書人，但亦是戰將一名，在古代，應該被稱為儒將，老C知道樓市將會回復生機，在這個時候不但不會炒人，而且仲發花紅，希望伙記可以在未來一段時間搏殺，就好似辛棄疾在《破陣子》所講，「八百里分麾下炙，五十弦翻塞外聲。沙場秋點兵。」知道就嚟要打仗，請部下食燒牛肉，食完就點指兵兵。
樓市將反彈 只欠催化劑
老友話冇理由，所有分析員、測量師都話樓市淡靜，樓價繼續下跌，又點會突然間變到好似打仗咁旺。其實，千怪萬怪都怪老C，佢大力唱淡樓市，其他人只是執佢口水尾，但又難怪，老C是物業代理界泰山北斗，佢話跌又點會有人話升，所以齊齊唱淡，嚇到不少冇必要賣樓的人都賣樓，有需要的人又唔敢買樓，樓價又點會唔跌。
樓價雖然比高峰時下跌接近兩成，但成交量極低，令到代理搵唔到食，這亦是老C要炒人原因，如果成交量低，但成交樓宇的質素甚佳，代表很少人買樓，樓價會繼續下跌，但如果成交樓宇的質素甚差，代表很少業主賣樓，樓市即將反彈，近日成交樓宇的質素早在老C心中，知道樓市即將反彈，但欠缺了一個催化劑。
本來最佳催化劑就是撤辣，但政府表示堅決反對，但就放寬外來專才買樓印花稅，七年之後可以退回。
與此同時，政府宣布搶人才，未來三年搶十萬專才，唔好忘記，專才的購買力比香港人大得多，有咁強大購買力，只有傻的人才會話樓市繼續下跌，老C有理冇理，一早發定花紅，伙記亦應該搏命。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
