2022/12/20
湯文亮
有老友話我撈極都撈唔掂，其實是有道理，我應該學老C賣樓做定存，無風無險每年收5厘利息，現在我叻晒都只是收2至3厘，不但要擔心樓價下跌，仲要擔心個租客唔交租，如果遇上租霸就更加大鑊。
再加上近日銀行搶存款，有錢存就是上門襯家，問銀行借錢，就算有物業做抵押都是下門襯家，老友問我有冇得反駁。
我話往日的崎嶇還記得否，利息在近幾個月才飈了上來，但在過去10幾年，存款利息長期在0.1厘，如果做定存收息租樓，莫講話交租，就算管理費都交唔到。不少做定存的人見利息太低，又唔想買樓，便走去買那些高息金融產品，最後可能連渣都冇。買樓收租，蠢就蠢啲，但勝在穩陣，但用高成數按揭買樓例外，因為那是賭博，不是投資。
我初出道時，對住公司咁大盤數，年尾時就相當頭痛，並不是我們被銀行追數，而是銀行希望我們借錢，另一方面又做番定期，一出一入是會蝕了一些利息，我當時很抗拒。
有前輩同我講，銀行在年尾亦要執靚盤數，他們要求有實力的客戶借錢，但又做番定存，是最簡單又安全做法，客戶一定蝕錢，但當做應酬費。前輩叫我千祈唔好拒絕做定存，銀行睇得起才會叫你借錢做定存。咁大件事一定要問一問老闆，想唔到老闆話一定要做，大家互補，合理到極，原來蝕錢做定存的人才會發達，我老闆是大有錢佬。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
