2022/11/09
湯文亮
當恒指跌至大約15,000點時，一個投資群組裏，不少人興高采烈大談如何繼續沽空，他們大多數是比較年輕的投資者，於是我寫下估底莫估頂這句老話，群組內有人話這是股市上升時才會講的說話，意思是股市上升是可以無限，大家要賺盡，千祈唔好沽走手上股票，問我是否搞錯？
估底莫估頂 即不要沽空
我當然冇搞錯，在股市上升時，大家被勝利冲昏頭腦，贏少啲都唔得，所以會話估底莫估頂。其實，這句話的含義並不是叫大家賺盡，而是叫大家唔好沽空，因為沽空即是估頂，而且現價就是頂。雖然很多人話股市仲有得跌，但如果大家知道，25年前恒指比今日還要高，你估有冇人夠膽沽空？我發文之後，股市連升幾日，恒指升超過2000點，今次真係畀人話烏鴉口。不過，股市下跌，他們才可以領會什麼是沽空即是估頂。
沽樓買股 可能輸得更慘
金管局前總裁任志剛話賣走自住單位即是沽空，我非常同意，但唔知點解，市場上賣樓的人大多數都是將自住單位出售，有幾個單位的業主反而唔會賣樓。他們賣樓的理由是擔心加息，而且仲話差不多全部評論員都話樓市會大跌，樓市又點會唔跌，大約兩三年後，等樓市跌定之後再買番，一定會用少很多錢。換句話說，他們將會賺很多錢。老實說，我唔知點解他們有咁大信心，就算樓價下跌，到時都要夠膽買番才可以獲利。不過，那些賣了樓的人睇怕以後都很難買樓，因為很少人將賣樓所得去做定存，大多數人會投資股票或者金融產品，現在我唔講大家都知道是什麼情况。所以，賭乜都可以，千祈唔好將自住單位攞去賭，咁樣做即是沽空，沽空即是估頂。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
