2022/11/04
湯文亮
有年輕朋友話近日有不少低價成交，令到他的自住單位樓價低於入市價；換句話說，他已經是一名負資產者。他有一份收入不錯的工作，供款冇問題，事實上他從來沒有拖欠供款，但他擔心銀行會追收差額，原因是他的自住單位資不抵債，現在每日都是活在誠惶誠恐之中。
年輕朋友問我是否試過被銀行追數，他估計我一定未試過，所以，唔知道擔心被銀行追數的苦惱。年輕朋友估錯了，我試過被銀行追數，在2008年，我有一個價值3億元物業按在銀行，只是借了1.5億元。銀行話測量師將我的物業估值大幅調低至1.5億元，我最少要補7500萬元差額，好彩當時有錢，便將1.5億元還給銀行。之後我問銀行點解要向我追差額，自問我從未脫過一期供款，而當時供款脫期的人非常之多，銀行應該向他們追數，銀行話他們都唔想，但測量師大幅將我的物業估值調低一半，如果唔向我追數，萬一日後我脫期供款，而又資不抵債，他們就烏紗不保，我話明白。
兩大理由 唱反調有理
近日唱淡樓市的評論鋪天蓋地，有老友問我點解要唱反調，我話有兩個理由。第一，香港的業主防守力相當之強，唔會咁輕易要賣樓，而且，絕大多數業主都會依期供款，因為業主知道，如果拖欠供款被銀行追數，甚至收樓就無話可說。
第二個理由比較客觀，如果任由分析員唱淡，試問怎會有銀行家明知樓價會下跌五成而唔向客戶追數，如果太多這類個案，樓價想唔跌都唔得。所以，我是迫不得已要唱反調，希望評論員手下留情，否則的話，會令銀行向依期供款者追數。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
