2022/10/18
湯文亮
有年輕朋友話經濟環境雖然不太差，但樓市氣氛唔好，利息又會上升，佢同太太商量過，不如將買入大約10年的自住單位賣走，唔使再擔心加息。
我話人各有志，如果有需要或者睇唔好前景，賣走自住單位亦是一個選擇。不過在賣樓之前，一定要了解一下樓市，最好去睇吓樓，唔好任由地產代理亂咁點。
年輕朋友話佢明白買樓要先去睇樓，貨比三家，賣樓點解要去睇樓。老實說，以前啲人教功夫，一定收埋一些獨門絕技，買樓貨比三家係人都知道，但賣樓貨比自家就唔會有人教，但事實上賣樓貨比自家仲緊要，否則隨時平賣一兩成，市場上又多一個大蝕讓成交。
找出其他放售自住盤 比較叫價
什麼是賣樓貨比自家，就是要到市場上搵一些同樣是打算賣走的自住單位作出比較。地產代理叫人賣樓一定話市場上劈樓盤多如牛毛，到有人要睇樓的時候，不是業主不方便，便是那個單位剛剛賣走；就算可以睇樓，都會發覺那個單位無論是地點，質素都冇自己打算出售的單位咁好，而且售價仲貴過自己個單位。所以，如果賣樓唔貨比自家，很容易朦查查賣走自己個單位，是不是很重要。
一般人買樓是會比較用心一些，莫講話貨比三家，貨比十家亦大有人在。不過，貨比十家的人大多數買唔成，但賣樓的時候就比較求其一點，地產代理講什麼他們就信。現在何只地產代理，有分析師、評論員、甚至玄學家都話樓市大冧，有可能大跌五成，現在唔賣就笨，仲邊有時間貨比自家。話時話，知道大跌五成，點解仲會有人買樓？
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
