《財務公司的「大雞三味」》

很多人不知道什麼是「大雞三味」，簡單來說，就是一隻雞用三種烹調方法，我細個時阿媽食譜就是大騸雞煲牛白腩、金針雲耳蒸雞、芙翅（雞雜）炒菜，以前食到最後，一定會剩番啲菜，現在時代進步，蔬菜一早清倉，剩下的是雞同牛白腩。

當一個業主攞層樓問財務公司借錢，財仔就會煲水掹雞毛，準備「大騸雞煲牛白腩」，一般來說，如果借五成以下根本不用審查，利息亦唔貴，年利率大約8厘。債仔有了錢就身痕，彷彿那些錢是自己賺到，而且只是還息不還本，一般債仔在兩年內都冇問題，兩年之後，有不少債仔本息都不還，但財仔的容忍度是很大，如此這般又過了一年，財仔開始追數，債仔冇得還又如何應對。

財仔按息愈借愈高 債仔劈價賣樓

財仔開始煮第二味雞，會對債仔話有另一間財務公司可以幫手，物業可以借到六成半，不過利息就要貴些少，年利率要12厘，債仔千多萬謝，佢唔知道自己係「雞」，財仔用金針雲耳「屈」佢。

去到這個地步，財仔洗定菜，準備快炒「芙翅」，不出半年，債仔還唔到息，於是問財仔有冇人可以幫手，一定有，不過利息要24厘，幾個月之後，那個物業就會變成銀主盤。銀主盤增加，細價樓亦開始爆煲。

不過，時代進步，不少債仔知道自己物業始終會變成銀主盤，於是劈價賣樓，當記者問那些業主點解要賣樓，答案千篇一律話加息，大家唔明白只是加息幾厘，點解要驚到賣樓，原來他們擔心的是財仔加息。