2022/10/14
湯文亮
有一位不太相熟朋友經常叫我賣樓，並且引用投行、分析員甚至玄學家的說話，今日唔賣樓明日就會很後悔，無論我點講，甚至話我自己有分數，都不能夠令那仁兄收聲。最後我唯有問，既然叫我賣樓，他自己有冇賣，那位仁兄話身體力行，他劈價兩成，低市價一成將自住單位賣走，而且售後租回，租金相宜，點計新業主收租都唔夠供樓，買家真係蠢。
條友期望我讚美一兩句，我唯有話，閣下真係犀利過神，佢雖然受落，不過話我太誇張，人點可以犀利過神，唉，唔讀書又點知我講什麼。
除非移民財困 自住單位忌賣走
我經常話，除非移民，或者經濟出現問題，否則在任何情况之下都唔好將自住單位賣走，如果要劈價賣就更加唔應該。
以低租金售後租回表面上對賣樓的業主非常着數，其實是中了買家誘敵之計，如果不是低租金售後租回，賣樓的業主一定會四出睇樓，最後他會發覺，其他單位不但租金比較貴，亦冇咁方便，質素也差了一些，結果是不會賣樓，仲要劈價賣，想都不用想。老實說，買家收順些少租金有乜問題，兩年後舊業主被踢走時就知道味道。有老友話，現在劈價賣樓的人是蠢，點解我會話那人犀利過神。
在《聖女貞德》歌劇裏面講，神雖然是無敵，但始終敵不過愚蠢，所以我話那個劈價賣自住單位的人犀利過神。老友話咁即是話佢蠢，不過唔應該用到神做比較，應該話人蠢冇藥醫，對嗎？
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
