2022/10/13
湯文亮
近日股市下跌，不少股票投資者非常心煩，股票評論員已經冇心機評論樓市，或者係唔好意思評論，樓市今年下跌了6%至7%，比高峰時下跌11%，已經惹來不少股票評論員負評，彷彿買樓是最愚蠢投資，但原來唔講唔知，今年股市在不知不覺間已經下跌接近30％，如果再講樓市，豈不是會被人話「100步笑50步」？所以，近日都唔聽見股市評論員評論樓市。不過，樓市下跌的聲音仍然鋪天蓋地，有物業代理話，那一班死硬派業主唔嚇都唔肯賣樓。
有股票投資者同我講，佢已經非常勤力，日日睇住個市，有乜好消息立刻入貨，有風吹草動立刻走人，但奈何時不利兮，仍然輸到貼地。投資者問我有冇心得，我話講飲講食還可以，投資股票只能答兩個字「不懂」。
較早前去了會展參觀潮州節，除了買牛肉打邊爐之外，仲買了不少花生糖，我最初將花生糖放在睡房書櫃，但當我每晚寫文章時，唔知點解心思思想食糖，結果搞到我的血糖上升，唯有將花生糖放在儲物室，血糖才回復正常。投資股票好似食花生糖一樣，隨時可以做買賣，遇啱跌市一定會輸死，不如將股票鎖入保險箱，優哉悠哉去旅行，去玩，隔了一段時間，大家會發覺，股價升了，究竟點解？
其實道理很簡單，每個投資者將股票鎖入保險箱，即是冇人賣股票，但市場上總會有人買股票，有人買冇人賣，股價便會上升，道理很簡單，但做起上嚟很困難，有人會質疑，跌市可以咁做，如果升市又將股票放在保險箱，豈不是錯失賺錢良機？其實，升市更加要這樣做，否則升少少就將股票賣走，會賺少很多。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
