《現在賣樓似被人set士碌架》

睇人打桌球見到那些桌球手很容易將個波打入袋，但到自己打又不是那麼容易，明明是一條直線都打唔到。

其實，打桌球的人知道，直線是最難打，賣樓都是一樣，不少業主賣樓，明明要的樓價唔貴，又有很多人睇樓，但賣極都賣唔出，那些業主可能不知道，他們給人set了士碌架，而且唔只一個人，而是一大堆人，如果唔係好似救士碌架一樣，借助枱邊走位，就很難將物業賣走，或者要以低價賣走。

至於什麼人set了要賣樓業主的士碌架？多到講唔晒，除了投行分析員、物業代理，連玄學家都話樓市會大跌，咁多人講樓市會大跌，試問要賣樓的人是否那麽容易將物業賣走？老實說，要直接賣樓是很艱難，一定要借助一些人才可以將物業賣走，做法就好似救士碌架一樣，至於點解，明就明，唔明就唔明。

先做靚租約可較易售樓

大家應該明白，樓市是分兩個市場，租務與買賣，現在所有分析員都只是話樓價會大跌，從來冇人談及租務市場，唔講大家都唔知，香港租務市場其實不俗，租金已經連升幾個月，不少內地租客交一年租金已經成為新常態。

如果打算賣樓首先要將層樓租出去，搵個靚租客，做靚條租約，幾個月之後拎出去市場賣，能夠賣得出去的機會比一個空置單位高得多，而且價錢亦會較好。

因為不少買樓的人都是用作投資，他們認為有quota唔買就很笨，空置單位反而沒有興趣，借助一條租約可以避過那些唱淡樓市言論，算是救了一個樓市士碌架。