2022/10/06
湯文亮
新加坡華瑞資本以逾207億買入長實波佬道21 BORRETT ROAD貨尾單位及車位，有傳媒話華瑞以高價接誠哥貨，都唔知個「死」字點寫。除了發表文章的傳媒外，不少評論員都話華瑞買得貴，尤其是現在樓市正在下行的時候，點解唔等遲吓才買，不少著名分析員已經話樓市會跌15%至20％，等多陣都唔得。
有老友話是否買得貴真的不是那些局外人可以評論，况且買得貴是對香港有利，點解要發表負面文章及評論，嚇走打算在香港買樓投資的外國投資者，點解唔可以話歡迎來港投資。
我同老友講，我在世界各地都買過樓，除了紐約之外，其他所有地方，無論是北京、倫敦、新加坡，當地人一定話我買得貴，這是人之常情，香港人亦不例外，所以，希望到香港投資的外地資金唔好介意，但我相信那些基金亦了解到這個情况，不會將傳媒的倒米報道放在心上。雖然大多數城市的人都會話到當地買樓的外來人買得貴，但傳媒是不會報道，因為傳媒知道，這是當地人的條件反射而已，隔幾年之後，當地人又會話樓價被那些過江龍炒起，言下之意，樓價升了唔少，有多少食唔到葡萄的滋味。
至於點解外來人會買貴樓，其實，一般人到其他地方買樓，寧願畀多一些錢都要買高層，最優質的單位，令到當地人錯覺外來人買貴樓。事實上，兩者是有所不同，很難作出直接比較，一般來說，在一幢住宅大廈，高層業主大多數是外地人，本地人未必捨得畀多兩三成樓價買一個高層單位。所以，當他們一齊坐電梯時，本地人就會話外來人層樓買得太貴。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
