昨日早上去茶餐廳食早餐，打算同其他客人傾吓美國聯儲局加息是否可以壓通脹，但發覺茶餐廳內很少客人。老闆話附近有一家叫「威爾茶餐廳」大減價，早餐只要10元，雖然出品唔好，招呼又差，但仍然爆滿，那位姓鮑老闆非常得戚話，唔使理出品好唔好，招呼是否周到，只要大減價，一樣可以非常好生意。大家都覺得好笑，好生意又有什麼用，賣一個餐蝕一個餐，愈好生意愈死，月尾找數時就知味道。茶餐廳老闆話趁得閒，多謝我長年幫襯，精心炮製一杯咖啡給我。
「威爾茶餐廳」減價給了我一些概念，如果唔搞好招呼，提高產品質素，單以減價來爭取營業額，就算贏都是輸，應該搞好招呼，提高產品質素，稍為減價爭取多一些客人，方為致勝之道。
大家千祈唔好以為茶餐廳以減價招徠客人是極端手法，其實聯儲局亦是用同一方法壓抑通脹，眾所皆知，美國通脹超過8％，已經到了失控地步。
聯儲局恐要犧牲經濟
通脹的成因有很多，與中國貿易戰令入口成本上升，制裁俄羅斯令能源價格急升，不斷軍演令物流成本上漲，疫情雖然屬於天災，但太多消費券亦令物價上漲，最主要是美國政府補貼租金，令租金上升，而租金上升影響通脹幅度達三成，但聯儲局話只要加息就可以壓通脹，但唔能夠話聯儲局講錯，只要加息加到冇人消費，莫講話去旅行，連出街食飯都唔捨得，冇人消費，經濟就會衰退，既然經濟衰退，通脹自然回落。不過，如果通脹回落至聯儲局目標的2％，就會出現一個怪現象，就是利息6厘至7厘，通脹2％，結果是有錢的人都唔會消費，因為延後消費可以賺取利息，到最後，加息不但令到經濟衰退，甚至令到整個社會蕭條，如果有朝一日經濟真的出現蕭條，聯儲局應記一功。
解決通脹如庖丁解牛，首先取消對中國的關稅，不再制裁俄羅斯，減少軍演令物流暢順，必要時可以推出租管，租金唔升，通脹自然會掉頭回落，不過大家都知道，每一件事都唔可以做，聯儲局唯有加息壓通脹。
