2022/08/17
湯文亮
有朋友唔睇好樓市前景打算賣樓，在賣樓之前希望我給予他一些意見，不過就不能夠叫他唔好賣樓。老實說，如果唔睇好樓市前景，賣樓亦未嘗不是一個辦法，最低限度釋放了自己心魔，聽到那些不利樓市評論不用心驚膽顫。朋友話這雖然或者可以算是一個意見，但沒有實際得益，他需要一些非常實在的意見。
我話有一個戒條，但很多人不會同意，只有賭仔才會明白，就是在賣樓之後唔好售後租回，因為莊閒對調，如果樓價沒有下跌，他就是一個輸家。本來勝負乃兵家常事，但輸畀買家則顏面何存。
倘樓價沒跌 賣家將成輸家
在物業投資領域裏有一戒條，就是大家合資買樓，到最後要出售時，最好是賣給其他人，千祈唔好由合資人買入，因為如果樓價日後升升跌跌，合資人當中一定會有人得，有人失，最後連朋友，甚至是親戚都冇得做，或者大家以後不再見面。
當一個打算出售自住單位的業主，首先要做就是要四出搵一個出租單位，然後考慮那個單位是否適合他們，做了一輪工夫，就會發覺很麻煩，所搵到的單位又不合他們心水，租金又貴，要交租點解要賣樓，最後極有可能打消賣樓念頭。
售後租回又唔同，乜都唔使做，又有一大筆現金收入。但那些業主不知道，他們今日不用做的事，兩年之後就會做，而且是一定要做，因為到時候新業主可能會收回那個單位，如果到時樓價大跌還好，或者可以再買番樓，如果不跌，有很大機會繼續租樓，替其他業主供樓。所以，賣樓最忌售後租回，但很多人不會同意，他們會話，唔知幾生修到，才可以售後租回，他們被業主逼遷就知道味道。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
