2022/08/11
湯文亮
近日市場鋪天蓋地講樓市下跌，包括不少知名評論員，本來在言論自由的社會，大家點樣講樓市都可以，但是不少叫人賣樓的人話：「現在是有樓人士的逃生門，如果唔賣樓，以後就會很後悔。」這句說話令我覺得很奇怪，我只聽過不少人講後悔賣了樓，很少聽人講後悔買了樓，甚至有人會話，好彩當日我冇賣樓，否則就會損失慘重。
有不少物業在過去幾十年間升值幾十倍，我聽過不少人話曾經擁有那些物業。不過，買入之後就心慌慌，唔知點解，在買之前覺得市道非常好，買入之後就出現逆向思維，更加唔知點解有人出價高兩三成，正是「有糊唔食，罪大惡極」，拿拿臨將物業賣走，賣走之後才發覺，物業地點甚佳，從來不會空置，眼看物業不斷升值，心中後悔不已。
至於有沒有人後悔買樓，事實上是有的，不過不是業主後悔，而是業主身邊的朋友替他後悔，甚至好似現在，就算不相識的人都替那些業主後悔，否則就不會出現逃生門這個講法，如果有朋友用到逃生門，業主想唔賣樓都唔得，否則連朋友都冇得做。老實說，如果連買樓咁開心的事都後悔，人生要後悔的事實在太多，生存都冇乜意義。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
