2022/08/09
湯文亮
有老友問點解全香港都睇淡樓市，但我不斷叫人唔好賣了自住樓，我話只有失去才懂得擁有。我是過來人，曾經兩次在沒有迫切需要時賣了自住樓，結果很辛苦才買得番，而且質素比之前的單位差很多。最後我同自己講，只有換樓才可以賣走自住單位。
結果我又食言，就算是換樓，買了新單位都唔會賣走舊的自住單位，這樣就愈買愈多。我只不過是將我的痛苦與經驗寫出來，真的是信不信由你。
今日有很多賣樓的人，都唔知道點解要賣樓。如果是移民就無話可說，財困就唔會講，而大多數人會話因為擔心加息。
我問過兩位擔心加息而賣樓的人，一位只是借了樓價一半的按揭貸款，我反問他點解要擔心加息；另一位則借了九成按揭，我問如果可以借九成，即係承受得起壓力測試，點解要擔心加息？
通過壓力測試 毋須擔心加息
擔心加息只是人云亦云，心魔而已。事實上，現在買樓的人有不少都是借八九成按揭，難道他們唔驚？無他，只是因為做足壓力測試，除了可以承受加3厘息的額外利息支出，亦留了足夠儲備應付不時之需。如果業主有足夠準備，點解要擔心加息，甚至擔心到要賣樓？
現在賣樓的人有一個共通點，不但只得一個自住單位，而且是首次置業者，他們從未失去過，唔懂得什麼才是擁有，以為將單位賣走之後，很容易買得番。
事實上，當他們賣樓之後，如果樓市沒有大跌，他們就會嘗試到失去的滋味，他日如果再買樓，就唔會咁輕易賣，因為他們懂得擁有原來是多麼矜貴。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
