2022/08/04
湯文亮
較早前有年輕朋友話睇唔好樓市前景，打算賣了自住單位，轉買債券收息，用作交租，好過欠下一大筆樓宇按揭。當時年輕朋友亦問過我的意見，我只是話小心賣咗買唔番，如果知道很容易買回差不多或者更佳單位，的確唔怕賣。年輕朋友話物業代理叫他不用擔心，賣走之後可以隨時買回，就算要交稅都仍然可以賺一大筆。哈哈，乜乜靠得住，豬乸會上樹。
年輕朋友很順利賣了樓，價錢亦唔錯，不過，他反而非常擔心，因為太多人睇樓，他已經臨時加價，仍然很容易賣走，既然很容易賣樓，樓市又點會大跌？年輕朋友是聰明人，當然了解到每一件事都有兩面，當賣樓的時候很容易，買樓就會很困難，他擔心日後很難買到合適單位，除非樓市大冧。不過，樓市大冧他又不會買樓，所以，他現在非常矛盾，亦非常後悔，在沒有必要的情况下將自住單位賣走。
成交偏低因放盤少
我相信年輕朋友不用太久就會領略到我話「小心賣咗買唔番」的意思。現在市場上鋪天蓋地話樓市下跌，但實際情况是市場缺乏出售樓盤，成交量偏低並不是沒有人買樓，而是沒有人賣樓。如果不是有咁多評論員話樓市下跌，估計更加少人出售他們的單位，但問題是倘若那些人不是打算移民，他們賣樓之後反而會了解樓市真實情况，最終又會變回一個打算買樓的人。
不過，忠言逆耳，很多人都唔鍾意聽實際情况，好似我話「小心賣咗買唔番」，年輕朋友唔鍾意，當時我亦怪自己多口，講什麼小心賣咗買唔番，講恭喜就可以了。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
