近日物業市場大吹人為淡風，不少分析員、財務顧問，甚至物業代理都睇淡樓市，亦有老友同我講應該放售一些物業，我話現在才放售已經太遲，我早已在樓市市况不俗時出售手上質素比較差的單位，現在靜待入市時機。老友話現在入市，唔係啩，話我唔通真係膽生毛？
物業代理唱淡 冀業主賣樓
老實說，我亦認為在疫情及未通關的情况下，樓市會作出調整，但幅度應該有限，現在中原指數約180點，我搵人打賭中原指數會不會下跌至160點，如果跌到那個水平，我輸；不過，如果中原指數上升至200點就是他們輸。我以為一定會有很多人同我對賭，誰不知一個都冇，由180點跌至160點，只不過是跌了11%，如果連11%都唔敢賭，就唔好話樓市會大跌。
有老友話我傻，現在話樓市大跌的人只不過是希望業主賣樓，尤其是物業代理，他們可以多做生意。我認為以這個心態講樓市下跌，可能會弄巧反拙，最終是業主唔驚買家驚，就算夠膽買樓，都會大力鋤價，與業主的叫價差距愈來愈大，成交的機會則愈來愈微，對物業代理有什麼好處，我真係唔知道，或者他們認為會嚇到業主賣樓。
內地人賣港樓 毋須等通關
有不少人認為，香港加息事在必行，加息令業主負擔加重，希望業主賣樓亦只不過是不想他們負擔高息。那些人咁樣諗就太睇少金管局，除了逆周期措施之外，還有壓力測試，如果咁嚴格都幫唔到業主守住自己物業，市况一定很壞，大家都劈價賣樓，甚至去到一個不可抗力的階段，業主蝕錢亦屬非戰之罪。
不少財務顧問對客人話，在通關之後，有大量內地人湧到香港出售他們的單位，樓價將會大跌，所以賣樓就要趁早。我覺得那些財務顧問不懂得樓宇買賣規則，如果要買入一個單位，最好是親身到現場視察；如果要賣出，反而不一定要親自到來，如果連規則都唔識，仲會有人相信？
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
