2022/07/15
湯文亮
近日物業市場鋪天蓋地唱淡樓市，不單止股市評論員，甚至一向睇好樓市的評論員都話樓市下跌。地產商當然唔會講，佢哋只會做，靜靜地減價促銷，如果唔減價，就加大佣金以及回贈，做生意手法而已。
有一類人從來沒有講樓市下跌，大家可能忽略了，事實上他們很重要，如果他們講樓市下跌，樓市真的會跌，因為他們掌握最重要資料，就是很多業主供樓有問題，他們追數追到氣咳。我唔講大家都知道，他們是銀行家。
睇淡樓市的人會以移民、加息，甚至收緊租的業主都會賣樓為理由，所以樓價下跌。其實，真正急於賣樓就是財困的業主，不過，不用勞煩他們賣樓，自然會有財務機構代勞，而市場上的銀主盤不多，代表財困而要賣樓的人不多。
銀行家能最先掌握樓市升跌
我問銀行家是否有很多人賣樓，他的答案很奇怪，佢話，如果問銀行借錢買樓，就唔會咁容易賣樓。而事實上銀行要賣樓的客戶不多，那些在財務公司用高成數按揭或者呼吸plan買樓的業主就唔敢講。老實說，問過銀行借錢買樓知道要過五關，斬六將，不但借得少，仲要做壓力測試，隨時要求有物業的父母簽擔保，咁困難才借到錢買樓，又點會咁容易賣，更加唔會為了加息而賣樓。因為大家認為，美國今次加息加得快，減息亦快，好似乾柴烈火一樣，一陣間就燒光。收緊租更加冇可能賣樓，除非是用BNO移民，如果唔賣，日後可能要同英國佬對分。
銀行家話暫時不用擔心，我又唔係咁睇，當銀行家話樓市不穩，可能已經太遲，都是小心一些，暫時唔好咁衝動買樓。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
