2022/07/12
湯文亮
我做了物業投資者咁多年，無論市况好與壞，不時都有人叫我賣樓。市况好的時候那些人會話，樓市升了咁耐，正所謂花無百日好，應該賣樓止賺；如果市况不佳，更加大條道理要賣樓。我的回答很簡單，就是收緊租，點解要賣樓？
傳媒可能知道這個理由，所以最近並不以移民、利息上升作為報道業主賣樓的理由，改為話有收緊租的業主睇淡後市而賣樓。老實說，如果收緊租的業主賣樓，市况的確不妙，但受訪者是否講真話，傳媒就要留意了。任何賣樓的業主都唔會同人講是自己財政問題，供唔掂而要賣樓，最好講法就是唔睇好後市，而事實上收緊租業主賣樓就是間接話畀其他人知是財政出現問題，唔畀人鋤價就奇怪。
出售收租中物業的最大理由，就是那些業主正在優化物業投資組合，趁市况不俗賣走手上最差物業，絕對不會因為睇淡樓市而賣樓。
有住宅單位收租的業主知道，如果將收緊租的單位賣走，日後是很難再買另一個單位。即使樓價如業主所料下跌，但跌幅不超過20%，賣樓的業主根本冇着數，因為再買一個住宅單位要付15%印花稅。所以，如果真係有好多收緊租業主賣樓，市况一定很差，我亦不得不改變投資策略，賣走手上一些單位，但事實絕非如此。如果太擔心，反而會做錯決定。
有人話不排除有個別收緊租業主睇淡後市而賣樓，所以不能話傳媒報道有失誤。我當然不會話報道有失誤，只是以偏概全而已。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
