有老友話，疫情似乎很快就會過去，一切將會回復正常，問我有冇加伙記人工。我話冇，佢話我是無良CEO，佢加了4%，這才是真老闆。
利用WFH淘汰冗員
到我問佢有冇炒人，佢話大約炒10%人手，全部都是那些WFH的同事，在疫情後仍然留戀WFH，仲不時單單打打話WFH點好點好。老友炒人是有一個原則，就是WFH的同事，最遲回復正常工作時間的就會被炒，老友強調，如果唔炒，對唔住返足工的同事。
老友果然是精明老闆，利用WFH淘汰一些冗員，在職的又可以加薪5%，不但拉高士氣，而且仲贏得掌聲。我唔知道自己有冇做錯，我唔准WFH，結果我沒有炒人，但亦沒有加人工，好彩同事都明白事理，沒有要求我加人工。我的希望是大家有飯食，唔好幾個冇得食，其他就加餸。
英國通脹近10% 根本冇得追
英國鐵路大罷工，我估計不會是單一事件，估計英國各行各業，包括教師、醫護都準備大罷工。老實說，英國沒有大罷工已經很久，英國在職的人已經手痕，冇理由香港都可以大三罷，反而英國工人就咁守法，大罷工已經蠢蠢欲動，加薪追不上通脹只是藉口，英國通脹已經接近10%，根本冇得追。如果各行業齊齊加薪10%，英國通脹就會加劇，你追我逐，加薪始終追唔上通脹，大罷工始終會來臨，是無法避免的事。
英國鐵路公司本來可以避免大罷工，但唔知邊個諗條屎橋，唔炒人就加2%，如果要加3%就要炒2000人。鐵路公司的目的本來是打算分化鐵路工人，誰不知令他們更加團結，而事實上英國政府批准鐵路公司加價3.8%，如果在唔炒人的情况下加薪3.8%，我相信鐵路工人不會罷工。面對工會壓力，減人手加人工未必一定行得通。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
