2022/06/16
湯文亮
近兩日有不少人同我講，香港政府真係冇用，連一隻海鮮舫都救唔到。我話殺人生意有人做，蝕本生意冇人做，珍寶海鮮舫長期蝕本，而且蝕得好勁，唔做又有什麼出奇，亦唔輪到政府去救。如果政府資助珍寶海鮮舫，我相信有不少衛道之士立刻行出嚟話政府浪費公帑，林鄭捱下義氣處理好這件事，李家超就不用煩惱。由此證明，林鄭與李家超是有默契，今次交棒將會是成功。
我問那些投訴的人，有幾耐冇去過珍寶海鮮舫，成班人最近的一次幫襯已經是10年前，當中有人竟然從未去過海鮮舫，既然如此，講什麼集體回憶？老實說，政府冇可能救到珍寶海鮮舫，要救就由市民去救，做法很簡單，多啲去食飯，有生意就唔會執笠，唔好知道要執笠就質疑政府點解唔救。
食肆臨結業才打卡 貓哭老鼠
我有一個老友的酒樓突然結業，我問點解唔早一些通知，等一些熟客可以打卡，做多一個半個月生意，估計一定會很好。老友話費事眼寃，那些到來打卡的人會話出品很好，服務又佳，老闆又好人，執笠之後會非常懷念；老友話如果出品好服務佳就多啲幫襯，有生意就唔會執笠，正式貓哭老鼠。
我同意老友所講，在疫情前我每年都會幫襯珍寶海鮮舫兩三次，尤其是出海之後，但我仍然不會懷念，或者會有人話我是冷血。其實，舊的不去，新的不來，話唔定很快就會有一隻新的海鮮舫；老實說，重新開一隻海鮮舫容易過做一隻長期蝕緊錢的海鮮舫。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
