《蠢人搵到錢 股市才興旺》

有老友不明白，股市跌到阿媽都唔認得，樓市仍然穩如泰山，理論上投資股票的人資質高過物業投資者不知多少倍，應該是股市大升，樓市最多是平穩發展；現在點解會反其道而行，這個世界太不公平。

我投資物業，都算做得唔錯，亦少有名氣，但在一班做各行各業的精英朋友當中，我算是資質平庸。朋友見到一個咁蠢的人在物業市場不但可以搵到食，而且做得唔錯，代表物業市場是一個很容易賺到錢的地方，不少老友亦將多餘資金轉投樓市。有老友甚至多謝我，如果不是我蠢而又可以在物業市場賺到錢，他們絕對不會投資樓市。我唔識得回答，只是認為老友真叻，不但賺到錢又可以取笑我。

股票市場又唔同，裏面太多叻人，我有幾個做股票基金經理的朋友都話很難搵食，我聽到又點會投資股票，以玩票性質，久唔久買賣一下，反而有斬獲，只是財不入急門，並不是我叻過人。

港首季新上市公司大減 市場沒咁多傻人

不少人話在股市搵食很容易，只要申請新股，上市之後立刻賣走，賺10%至20％是很容易。以前可能還有機會，現在那些新上市公司股票股價，不少在當日立刻跌破上市價，永遠都返唔到家鄉，新上市公司唔知有心或無意，在公司上市講到前景如何秀麗，上市後立刻發盈警，第一次申請就不知者不罪，第二次就是蠢，第三次是傻。所以，今年第一季新上市公司大幅減少，並不是港交所審批嚴格，而是市場上沒有咁多傻人。

香港股市如此繼續下去，終有一日會追上新加坡。全世界都同意，新加坡什麼也叻過香港，就算大學的排名都比香港高，但有一件事傳媒沒有報道，就是新交所每日成交金額。我講大家都會相信，每日大約10億至15億新加坡元，折合大約56億至85億港元，至於點解咁少，就是新加坡太多叻人，叻人知道在股票市場唔夠人玩，所以就敬而遠之。其實，要股市興旺是很容易，只要畀人覺得蠢人都可以在股市搵到錢。

（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）

▸更多文章：投資心得文章 | 湯文亮 紀惠集團行政總裁