2022/05/19
湯文亮
十幾年前我們公司買一幢大廈，對方是海外機構，所有條件，成交日期，什麼也傾妥，提供的租金回報亦不低於市值，但在成交前兩個星期，我發覺業主提供的租金回報是經過刻意調整，否則就會大幅低於市值，原因是業主給予租客不合理的免租期，於是要求取消成交或者業主減價，經過一番擾攘，最後業主減價。我當然被業主的伙記鬧到失魂，話我用荷蘭式拍賣鋤價，其實我沒有，業主是有權唔賣。
雖然事情隔了咁多年，但到現在，仍然有不少業主在賣樓時會整靚啲租約，但又唔聽到有人以租約回報未能反映真正市值來鋤價，或者，買家在還價時已經計好條數，根本鋤無可鋤。
收購Twitter鋤價兩成非不可能
「電車佬」馬斯克以440億美元收購Twitter（美：TWTR），到最後一刻以Twitter用戶有發水20%至25％之嫌鋤價，收購亦立刻終止，Twitter 股價亦大幅下跌。
我估計今次馬斯克用荷蘭式拍賣鋤價，絕對唔相信馬斯克事前唔知道Twitter用戶數目有大幅發水，只是馬斯克先鎖定收購最高價，然後慢慢鋤價，並且接受Twitter將用戶數目發水5％，Twitter亦唔敢答應，代表Twitter真的有將用戶數目發水，就算雙方取消交易，Twitter股價亦很難回復之前高位，想唔賣都唔得，馬斯克這招真係高；就算Twitter方面唔賣，亦不能沒收馬斯克10億美元誠意金。最後我估計馬斯克一定可以鋤到價，至於鋤到幾多，就要睇馬斯克功力，估計不會少於兩成，持有Twitter股票的人今次真係被馬斯克玩死。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
