《大行評樓市專家都很年輕》

有老友同我講，樓市一定會下跌，除了部分香港人移民之外，內地人的購買力亦下降，美國聯儲局加息，新樓有大量庫存等。不過，那些都不是最重要的理由，有大行表示，在未來4年，樓價會下跌18%，大行一定有確實資料，非常精準地預測樓市，所以樓市會下跌，但不是大跌，除非有更多不利香港樓市的因素出現。

老友的說話令我想起初入行的時候，有一日發覺一個來了香港不夠半年的外籍人士寫評論香港樓市文章，於是我同佢講，閣下連北角同北潭涌都未分得清楚，又點可以寫評論樓市文章。點知佢話，天下文章一大抄，評論樓市的文章有一條物質不滅定律，就是短期跌，長遠升，就算是樓市處於上升期，但一年內出現回調絕對不出奇，就算唔跌，業主也不會詐型，最多是笑下那名評論員，至於講到10年咁耐，相信有九成以上機會上升，所以，有了這個定論，寫評論文章時避重就輕，隨時準過印度神童。

我有時見到一些大行評論文章講樓市長遠會下跌，於是又問這名外籍人士，佢話人不為己天誅地滅，當大行覺得樓市前景不錯，他們反而會講樓市遠期會下跌，如果講樓市長遠必升，又點會有人肯賣樓，大行又怎樣入市。