《股市上升 更多人「後悔」》

有評論員同我講，若果唔係我預測話恒指今年會升至兩萬八點，佢一定會入市，而且仲叫他的信徒入市；但我講升，他一定講跌，仲話恒指兩萬點不保，今次唔知點樣同信徒交代。

投資自負盈虧 勿怨假消息

我是很佩服那些評論員，他們一定有辦法交代，而且仲會好好睇睇，根本不用替他們擔心。事實上，不少評論員睇淡今年股市，大家可能唔相信，太多人睇淡反而是一個入市信號，這是非常微妙。睇淡的意思代表他們準備入市，就算在二萬點才入市，一輪衝鋒之後，又會升返上去兩萬四、兩萬五點，這些事經常發生，大家不用大驚小怪。

反過來說，如果股市下跌，那些專業評論員話唔使驚，只是假跌，很快就會U形反彈，代表他們還持有大量股票，很多時一面叫人唔使驚，另一面沽貨。大家千祈唔好埋怨別人畀假消息，投資就是自負盈虧，贏咗唔會分畀人，輸咗當然唔可以問人攞返。

很多人以為當股市下跌，一定會有不少人叫苦連天，怨天怨地，其實是錯覺。我唔知其他地方，在香港，股票投資者大多數會默默承受，那些大聲講話輸了幾多幾多的人，其實是曬命，代表他們輸得起。

股市大升又後悔買得少

近日股市大升千點，反而聽到不少人話後悔，在恒指兩萬三點的時候都唔落注，現在就恨錯難返。不過，叫他們即時買股，他們又未必敢，如此這般蹉跎歲月，到了股市上升到一個準備下跌的時候，那些人就會入市，仲會話股市還有大把上升空間，結果又是一條好漢。不過，股市雖然好好玩，但千祈唔好畀一些聲音誤導，當很多人話後悔時，原來股市正在上升，不但沒有買股票的人後悔，就算有買股票的人都會後悔，後悔買得少。

（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意。）

紀惠集團行政總裁 湯文亮