《物業市場上的回鍋肉》

在我學師的時候，與一個租客商談續約，全部條件都得到雙方同意，但租客遲遲不肯簽新租約，到了最後一日，租客要求大幅減租兩成，否則就立刻遷出，我收到租客要求之後立刻向老闆報告，老闆雖然只大我幾歲，但經驗豐富過我好多，立刻叫我答應租客要求，同時話晚上請我食飯，我心諗，今次大鑊了，唔通係食無情雞。

晚上去上海總會食飯，老闆叫了回鍋肉，據我所知，回鍋肉是四川菜，上海總會未必做得很好，但老闆叫這個餸一定有他的目的。

老闆話，如果今日唔答應，租客一定走，咁就冇仇報，續了約，兩年之後大家傾續租，只傾不簽，到最後一日才大幅加租兩成，這招叫回鍋肉，如果今日讓租客走了，即是連肉都唔要，又點能夠做成這味回鍋肉，我知道老闆咁犀利，以後唔敢跳槽，因為老闆一定答應我加薪要求，但在適當時候就會炒了我，這是職場上的回鍋肉。

租客奪米芝蓮星遭加租 是業主無義

有收租老友同我講，他很辛苦才等到一個租客攞米芝蓮，知道租客可以承受，可以大幅加租，加租沒有問題，但到了下一次續租，租客根本唔傾，到期就搬走，所空置單位很難再搵到好租戶。

老友不明白，業主在租客攞到米芝蓮星之後加租，代表雙方已經失去互信程度，第一次加租，租客還可以勉強接受，但租客擔心業主在第二次續租時又大幅加息，一早就會搵定地方搬，拒絕做回鍋肉，業主因加得減，所以，業主應該有心理準備，攞到米芝蓮星的租客，第一次是會續租，第二次就唔會，並不是租客無情，其實是業主無義。