《不能主動離開的元宇宙？》

有老友話，未來的世界是元宇宙的，根據各方專家所講，玩元宇宙是沒有危險，如果唔識得玩元宇宙，將會與世界脫節，最後被淘汰，老友咁前衛，嚇了我一跳。

我問老友教仔遇到什麼問題，老友話個仔成日打機，唔肯收手，個仔話如果離開，他會損失很多武器，或者失去「升呢」機會，很多時要強硬關機才可以令小朋友離開。老友可能不知道，這就是元宇宙的入門版，元宇宙最危險的地方就是不能主動離開。

進元宇宙如遊地府

大多數人以科學態度睇元宇宙，我認為應該以宗教，甚至是道教來看元宇宙。大約20年前，我在新加坡工作，當地友人問我是否夠膽遊地府，我話膽生毛。

友人話有一個道教師傅帶隊遊地府，宗教名詞叫觀落陰，大家只需要瞌埋雙眼，師傅就會帶大家遊地府，未必全部人都成功，成功的收100元坡幣，唔成功收一半。

二十多人一起打坐，過了一陣，師傅拍醒我，原來已經過了4個小時，當中只得三幾個成功的人遊地府，其餘的斷片4小時，我後來懷疑成功的是做媒，斷片的被落了「依打」--一種比哥羅芳更勁的蒙汗藥。我沒有參加第二次，理由是如果師傅唔拍我，豈不是我永遠唔會醒，萬一師傅突然離開人世，我又會如何，咁危險的事一定唔會再玩。

現在的元宇宙是科學化，戴住個眼罩可以接觸到程式設計師設計的世界，可以見返失去的親人，或者重掌昔日的權力。萬一設計師唔想參加的人重回現實世界，那人就會失落在程式裏面，咁危險的事，我暫時都未有打算參與。