不打算上市 不要經營食肆

在一個講座中，竟然有觀眾問有那一家食肆較抵食，這是一條難題，因為抵食定義因人而異，但有一條金科玉律，就是有打算上市的食肆就最抵食，那些公司在上市前都是先求量，後求價。 食肆生意蠅頭小利 不及一隻殼價 所以，有一段時間會好抵食，甚至抵食到大家唔相信，無他嘅，上市之後隻殼都值幾億，在上市前預先「回贈」，算是蝕頭賺尾，順便替老友陳永安賣廣告，我知道太興打算上市，所以，現在應該很抵食，觀眾竟然話同意，又畀我過了關。 有報道說馬德鐘將旗下兩家食肆結業，聽聞食肆是馬德鐘與他的兄弟合作，其實，如果是馬德鐘的兄弟打算開食肆，倒不如借錢給他們開，結果都是一樣化為烏有，蝕錢並不是最大問題，傷了兄弟感情就不好，而且並不是話唔做就可以唔做，還有很多手尾要跟，例如租約就一定要履行直至租約完結，如果馬德鐘有簽私人擔保，想甩身也並不是太容易，以玩票心態開食肆，大多數結業收場，最多只是替員工搵到一份工，所以，開食肆的人一定要有上市心態，要賺也不從食肆賺來蠅頭小利，最低限度要賺隻殼。 投放太多心機 影響本來生意 有很多生意人應酬多，每月飲食消費不菲，於是起了肥水不流別人田心態，自己開食肆，他們並沒有想到會為自己負上一個包袱，我見過不少那類人，最後因為食肆拖垮本身生意，理由當然有很多，最大的是那些人放太多心機在他們的食肆，忽略本身生意，所以，搵到錢最好買樓收租，租畀其他人開食肆，自己專注老本行就最好，千祈唔好以為自己是萬能，一項生意做得成功，並不是代表另外一門生意也會做得成功，尤其是做食肆，要有多少天分的人才可以做，在過去有不少人搵我合作開食肆，大家夾錢裝修，再租用我的物業，但畀我一一拒絕，因為我知道結果是食肆會困難地經營下去，而我則沒有租收，唔通自己告自己欠租，所以，我都是做番老本行，千祈唔好為自己給自己添加一個枷鎖。