《新一份施政報告被離開港人鬧爆》

有老友話，林鄭可唔可以做好少少，寫一份唔好畀咁多人鬧施政報告。我話鬧林鄭的人只是條件反射，林鄭份施政報告就算做足100分都會畀人鬧，老實說，鬧她的人未必唔同意這份施政報告。

其實，要搵藉口鬧人隨時都可以，同一件事可以以唔同角度鬧兩次，政府發展北部都會區，提供超過50萬個單位。有評論員話，當年董建華是八萬五，今日是50萬，樓價一定大冧，評論員可能忘記了，當年是每年八萬五如今是整個北部都會區的多年供應，一次過同連續供應的分別，評論員可能忽略了。另有評論員話，發展北部都會區掀起炒風。供應多了，反而會掀起炒風，這點我不明白。

有老友話，供應雖然增加，但先少後多，遠水未能夠近火，我話以後唔敢坐佢車，原來老友開車好似揸殲20，一開車就會去到盡，房屋供應先少後多是正常的。

由冒升地移民到衰退地 移英港人如去填氹

收到流亡英國的朋友來電，鬧林鄭鬧到飛起，話早知林鄭會寫這份施政報告，就應該睇定啲才移民去英國，在房屋大量供應之下，未來人均居住面積應該比現在大得多，或者冇英國咁大，但唔使住到冇雷公咁遠。

英美政府都叫外資離開，以為香港一定會冇咗個金融中心地位，但原來唔係，施政報告大力提倡金融、創科產業，根本唔夠人手，所以要增加引入優才。既然在香港搵到份優質工作，又唔需要遠涉重洋做貨車司機，人工仲只得香港零頭咁多，而倫敦金融中心地位正在退化，由巴黎、法蘭克福等替代，由一處正在冒升的地方移民去一處衰退的地方，似乎不合邏輯，移民去英國的人又點會開心？

在疫情下，英國儲備早已乾塘，亦印了不少銀紙，估計很快就會加稅，現在移民去英國是替人填氹。所以，林鄭這份施政報告不但不受移民去了英國的港人歡迎，反而畀他們鬧爆，總之好人難做。