《恒大債券事件 難衝擊港樓》

對於一個睇淡香港樓市的評論員來說，恒大（3333）事件是千載難逢機會，根本不用考慮就可以話恒大債券事件，令到不少香港人遭受巨額損失，他們甚至會被銀行追數而不得不賣樓，供應增加，樓市自然下跌。

這是一個合情合理假設，但忽略了一件事，香港作為一個金融中心，無論是外來人或者香港人都清楚一件事，就是自己投資自己負責，不能諉過於人，就好似澳門人輸錢，唔通走去賭場抗議？澳門人不但不會抗議，甚至會自嘲話輸完又嚟賭過。作為一個成熟投資市場，投資者只關心贏咗錢可唔可以攞得走，而非輸咗錢可唔可以攞得返。

讓內地人認識港是成熟投資市場

香港銀行家的確有叫客戶買投資產品，甚至借埋錢畀客戶，但不會集中在一兩隻投資產品，最低限度都有五六隻，就算當中一隻有乜冬瓜豆腐，輸到盡都是輸十幾個巴仙。况且，銀行家很穩陣，見勢色唔對就叫客戶斬纜，如果客戶唔斬甚至趁低吸納，風險就由客戶自己負責。無論如何，如果只是得一隻債券出事，未至於有銀行要向客戶追數，如果陸陸續續有其他債券出事就難講。

所以，恒大債券出事，不但不會令香港樓市下跌，反而會被內地人認識香港是一個成熟投資市場，無論股票、債券、樓宇，贏咗錢一定可以攞走，不過，輸咗錢就攞唔返。