《酒香也怕巷子深》

有準米芝蓮租客話在他租用的舖位附近，搵到一個更大，租金非常優惠的舖位，唔會同我們續租。同事已經提醒，他所搵到的舖位附近其他的舖位，差不多全部都是營業至下午六時，入夜後人流很少，而租客是做外賣小食為主，不足夠人流是大忌，租客話唔怕，因為「酒香不怕巷子深」。

同事話已經有著名小食租客頂上，租金多三成。我話並不是租金多少問題，我睇住租客成長，鼓勵他們攞米芝蓮，就算要租其他舖位，最低限度都要留番最初的舖位，正是進可攻、退可守，萬一生意不如理想，都可以退守至最初的舖位。

獲米芝蓮宜保留舊舖 可攻可守

其實，我打算叫租客租多幾個舖位，借米芝蓮準一星的銜頭做大佢，情况好似添好運，最近被快樂蜂以逾4億元統一股權。如果租客家人同心協力，開多幾間分店，由中央廚房控制品質，難保幾年後唔會被內地的上市公司收購，屆時收返幾億就全家人過美麗幸福生活。

其實，都唔知邊個講「酒香不怕巷子深」，這句說話已經害死不少人。現實是「酒香也怕巷子深」，就算連米芝蓮三星，西班牙餐廳「鬥牛梗」都頂唔住，邊度會有人坐兩小時車去食飯，久唔久一次就會有，沒有回頭客，做餐館又怎能生存，酒香都冇用。