《全行催谷樓盤多數買唔到》

有老友話較早前有物業代理介紹一個樓盤畀佢，不但價錢合理，而且質素相當好，仲話物業是銀主盤，銀主到價必賣，老友毫不猶疑話可以出offer ，而且一毫子都唔減；不過，物業代理建議減多少，可能有死雞執，過了幾日，仍然沒有下文。老友話唔明白，物業代理做生意，既然有客畀到價，點解唔接受，反而建議客人減價，即是有生意唔做？

早已留給自己友

那個樓盤我也收到，可以說是全城催谷，但在物業市場，有一個很奇怪現象，就是全城催谷的樓盤，大多數買唔到，並不是業主或者銀主不想出售，而是已經有一個準買家，全城催谷即是搵所有人替準買家墊底。業主的準買家大多數是家人或者是樓盤合伙人，而銀主準買家當然是銀主自己人，當大家出價之後，準買家就會出一個較高價錢，合情合理，那個樓盤一定會賣畀那個準買家，嚴格來說，這是一個交叉交易樓盤，成交價不能作準。

點解物業代理一定要買家減價？因為他們知道，就算畀到價都買唔到，結果可能會被買家埋怨，如果買家減價，一樣是買唔到，不過物業代理就會話買家孤寒，如果畀到價一定買到。老友話原來物業買賣都咁複雜，我話不是複雜，而是充滿哲理。