《借唔到錢買樓令樓價難大跌》

有老友話，香港樓市在經濟好的時候仍然升得很慢，在疫情過後，有大量港人離開，樓盤充斥市場，樓市一定會下跌，他替我擔心。我覺得很奇怪，點解老友唔替自己擔心，反而替我擔心，原來老友只得一個自住單位，無論樓市升跌，都唔會賣走，否則就要租樓住，條數點計都唔划算，所以不用擔心。

我問老友點解唔買多幾個單位？老友話買鬼買馬，銀行都唔肯借錢。老友在不知不覺間講出樓市不跌的理由。借唔到錢買樓，樓價又怎會下跌？

早幾日我同上一任金管局總裁陳德霖食飯，佢問我有冇人鬧佢推出逆周期措施，我話當日不知幾多，無論銀行家或投資者，他們認為金管局阻住地球轉，應該好似以往一樣，可以自由向銀行借錢，由銀行自負盈虧，最多設一個七成上限。

當時有不少人叫我同陳德霖反映。我話一定會，我會同陳總講，在任何壓力下都不能夠撤銷逆周期措施，否則初次置業者就要畀多很多錢買樓，負債纍纍，是非常危險，而炒家就會賺到盆滿缽滿。當樓市下跌，有損失的人就會怪罪金管局，不少人話我專登唱反調，唔似一個物業投資者。

逆周期措施其實是定海神針

大家可能不了解逆周期措施其實是定海神針，在樓市上升時，可以壓住樓市升勢，理由是大家都借唔到錢買樓。當經濟環境不好，樓市又不會大跌，因為大家在樓市上升都借唔到錢買樓，除了自住的單位外，很少有其他單位，既然冇樓，當然冇樓可賣，樓市又怎會大跌？調整一定會有，幅度卻不會很大。不過，不會有人說當時金管局推出逆周期措施是做得對。