《成熟投資者喜歡打書釘》

有老友問我有冇去書展，我話疫情下，雖然已經打了兩針，但咁多人的地方，可免則免，而且我去書展都唔會買書，最多打下書釘，如果要打書釘，不如在屋企打，因為仲有很多書仍然未睇。

老友話不明白，點解我肯定唔會買書。我話不同年紀的人對於書籍有不同詮釋。少年好買書，買了之後三幾日就會掉走。青壯好藏書，買了之後唔會讀，但又唔會掉走，會放埋一邊，等到老婆鬧才會大手清理。年長者好讀書，即是打書釘，很少會買書。老友話唔知有這個情况，唔知真定假。

年輕投資者買買賣賣 代理最愛

老友可能唔知道不同年紀投資者對於投資物業亦有不同的詮釋。年輕投資者鍾意買買賣賣，摸出摸入，就算買到一件優質貨都唔會長揸，賺多少錢就會賣走，跟着大宴親朋，物業代理最愛。

中年的投資者發覺當年買入的物業，如果不賣走，今日升幅驚人，於是只買不賣，什麼逢三退一都是廢話，恐怕捉到鹿都唔識脫角，最後揸到成手貨，當遇上風吹草動，如果財力不足，手上的貨就會被銀行大手清理。

年紀比較大的投資者不時去睇樓盤，但很少還價，所以，物業代理最不喜歡年紀比較大的投資者，話他們只睇不買，只不過是打書釘。