《盡早入市 坐享其「乘」》

有老友話今年歐洲國家盃我又估中，他在意大利仍然是一賠七的時候已經買了，問我點解可以估得咁準？我話愈早下定決心買一隊，反而會集中注意力去分析那隊波，一個唔覺意那隊波攞了冠軍就肥過豬仔；但如果分場買，反而要分析兩隊，沒有那麼準確，例如在決賽，如果我不是買了意大利，我多數會買英格蘭。

有人話愈早買，如果真係攞到冠軍，可不可以叫坐享其成，我認為應該叫坐享其「乘」，因為派彩會乘多幾倍。

港有望通關 下半年樓市升機會大

友人話，除了估波，樓市我亦估中，今年初我話樓市有10%至15%升幅，不少專家撰文話我傻，有咁多人移民賣樓，樓價又點會升？就算樓市升，都會在下半年，當疫情緩和，超過七成香港人願意接種疫苗，開關之後才可以發生。

老友問，點解樓市在疫情未通關的情况下，上半年已經上升？

老友可能不明白，香港人唔怕蝕底，最怕執輸，所謂「執輸行頭，慘過敗家」，既然知道香港有機會通關，樓市下半年有很大機會上升，點解要等到下半年才入市，反而上半年唔入市。盡早入市，不但是坐享其成，而且是坐享其「乘」，早入市賺多好多。