《識買一定買摩貨》

有老友問：「怎樣才算是頂級投資者？」我話是懂得買摩貨的人，老友以為我講錯，應該是賣摩貨的人。

其實，要賣摩貨是很容易，買十幾個單位或車位返嚟，再賣走三兩個是很容易，但剩下的很難賣走。情况好似去買橙，小販用100元買入10個橙，而有人可以用11元一個任揀，表面上是小販每個賺了一元，但被人揀完揀剩，只剩下一大堆籮底橙，一元一個都未必有人買。所以，能夠以合理價錢，買到優質摩貨，雖然賣家是賺錢，但買到摩貨的人仍然是贏家。

短炒賣走優質商廈 賺少少後悔感失威

有人問我投資物業有咁長時間，最失威是哪一次？蝕了幾次錢？我最失威的一次是買入一整層高樓層商廈，賺了十幾個巴仙就賣走。我賣走之後就呻笨，咁靚的物業冇可能賣走。以後，我冇機會買入類似樓層，即使我願意出高價都買唔到。

那次雖然表面上賺到少少錢，但其實是輸了很多，因為那層商廈有巨額升幅，我唔知人點睇，但我自己認為是失威失到盡。

有一些人可能時來運到，突然間可以買到一些優質物業，但又唔夠膽揸，最後要將物業摩走，表面上賺了一些easy money，其實是錯失了一生不可多得的良機。碰上這些機會，千祈唔好手軟，唔好怕畀錢人賺，因為結果是那人賺得少，接手的買家賺得多。如果唔願意接摩貨，最後損失最大的反而是不願意接摩貨的人。