《一聲歧視大過天》

在外國讀大學時，有一晚和同學去酒吧飲酒，識得幾個靚女，兩個人應付不來，立刻叫多一個同學到來。同學來到，大家都很奇怪，話晒那一間是高級酒吧，有兩個大隻佬守門口，以同學衣著，大隻佬點會畀佢進入酒吧。同學話大隻佬的確唔准佢入酒吧，但同學問是歧視佢，抑或歧視中國人，大隻佬立刻放行，歧視大過天。

做營銷的人知道，歧視是一個非常好的銷售策略，有多少似激將法，回港後我有時去名店食飯，見部長推銷一些普通菜式，例如梅菜扣肉、薑汁芥蘭給一些暴發戶，被暴發戶問部長是否睇佢唔起，部長當然話唔敢，於是燕翅鮑齊上，加條老鼠斑、半隻炸子雞、炒碟菜，暴發戶反而滿意。部長同我講，如果他一早介紹那些菜式，就會被暴發戶問是否當他是暴發戶，反而會叫一些普通小菜，就以上例子，歧視是不是很有效的營銷手法？

「歧視」是非常好的銷售策略

新冠變種病毒在菲籍家務助理族群大爆發，香港政府於是提出強制菲律賓家務助理接種疫苗，基本上已有不少反對聲音；但政府知道，如果不強制執行，倘疫情在菲籍家務助理族群大爆發，政府會畀人話抗疫不力，明知新冠變種病毒大爆發，都唔敢強制她們接種疫苗。

正當政府進退維谷之際，菲律賓外長話香港政府歧視菲國家務助理，既然用到歧視，什麼也不用說，林鄭立刻順水推舟，容許菲籍家務助理不用強制接種疫苗，若果唔好彩疫情日後在菲籍家務助理族群大爆發，隻鑊就由菲律賓外長去孭。我相信菲律賓政府亦知道關鍵所在，唯有在內部推動菲國家務助理接種疫苗。菲外長提出的歧視指摘，間接解決了香港政府的困境。