《代筆？不！》

作為一個定時在報章雜誌發表文章的人，如果被人問文章是否由其他人代筆，會覺得是侮辱。不過，凡事都有例外，我記得在十多年前，我開始在報章雜誌寫地產文章，當時我用了一個比較新穎方法，就是用歴史解釋香港地產，有不少人問我是否由別人替我寫，我會話不但唔覺得是侮辱，甚至覺得是恭維，因為文章一定寫得唔錯，畀人覺得是搵人代筆。自此之後，冇人懷疑我搵代筆，因為文章寫得太差。

代筆寫得太好 反惹懷疑

有老友問我讀大學時，有冇搵人代筆寫論文？佢知道有不少有錢仔都會搵人代筆，我話替人寫就試過很多次，搵人代筆就未試過。做代筆有一個守則，就是不能寫得太好，否則會惹人懷疑，當然又不能夠太差，連煮熟了的雞蛋可以孵出雞仔都可以寫得出來，那個代筆抵打屁股，搵人代筆的人已經一身蟻，唔需要打屁股。

大家唔好以為一定是搵別人寫的文章才是代筆，有不少評論員引用其他大行的分析資料作為自己分析理據，例如有評論員話在英國實施BNO計劃之後，有大行分析指香港人賣樓走資2800億元，涉及大約是4萬個單位，供應增加，樓市必定會大冧。不過，昨日彭博已經將走資金額降至1500億元，涉及樓宇供應量亦會大幅下跌，樓市大冧的機會亦減弱。撰文指出樓市會大冧的評論員一定不會承認是自己錯誤，他會話是大行分析錯誤，即是話大行是代筆，而且是沒有潤筆費的代筆。