《唱衰目標 自己容易得手》

有年輕朋友話，唔知點解，近日好似犯了小人，不斷被一個女仔周圍唱，又話佢經常溝女，欠人很多錢，諸如此類，溝女的確有，不但沒有欠債不還，欠人錢也未試過，問我點解個女仔要咁唱衰佢。

如果我是睇相佬，我會話佢紅鸞星動，年輕朋友是「特色單位」，個女仔想溝佢，於是周圍唱他，令到無其他女仔夠膽埋佢身，那麼這名女仔就可以獨佔鰲頭，年輕朋友話咁即是斷佢米路，唔怪之得近日約任何女仔去街食飯都不成功，有個別女仔仲叫佢以後唔使再約佢，最奇怪的並不是初次約會，已經約過無數次，最近突然反轉豬肚，除了這個原因，相信都沒有其他原因了。

玩政治 美國的確是高手

年輕朋友話講起睇相佬，到今日仍然頂住條氣，事緣兩年前他有一個朋友出售一個單位，他有興趣，同時有一名對術數有研究的朋友自告奮勇替他睇風水，睇完後對所有朋友話那個單位風水不佳，邊個住邊個衰，最後業主要大幅割價才可以賣走，年輕朋友自然做了衰人，但最後居然發覺買家竟然是自告奮勇睇風水的朋友的家人，真係水洗都唔清。其實商場如情場，唱衰別人自己得益這種事經常發生。

英國佬作了一段小新聞，話中國政府在新疆對維吾爾族進行種族滅絕，這個荒謬講法本來連英國佬自己都不信，但蓬佩奧睇到一個空位，於是食住上，不但講到似層層，仲叫其他國家制裁中國，有了美國佬做帶頭大哥，其他國家如英澳加日及部分歐盟國家亦參與指控中國，結果是中國減少與那些國家的貿易，當然令部分國家受到嚴重損失，至於美國，對中國的貿易不但沒有減少，無論對中國以及新疆進出口都有大幅增長，那些指控中國的國家見到這個情况就知道中了美國的計算，白白將與中國的交易送給美國。

不過，最慘就是連呻都也不敢呻，到現在仍然迫住話中國在新疆進行種族滅絕，所以話，玩政治，美國佬的確是高手。