《找共同朋友見證 可避免借錢畀人》

近日一單解決欠債方法令到不少債主寢食不安，有老友問如何避免借錢畀人？首先，唔好問人借錢，否則那個人以後就會有藉口問你借錢，唔借就是閣下不對；其次是唔好貪小便宜，買演唱會飛、訂位食飯，可以自己做就自己做，否則寧願唔去，叫人做就即是畀機會那些人日後問你借錢。

唔借錢畀人的確會有一些麻煩，如果話自己不方便，轉頭就會被那個問你借錢的人周圍唱閣下財困，仲叫其他人小心，唔好借錢畀你；如果你話要問問老婆，就會話你怕老婆。總之，用什麼方法推搪，都會被人反咬一啖。

不過，最毒的藥都有解藥，方法一定有，或者大家未必想得到。

借錢怕被人知 嫌麻煩就唔會借

我問老友，如果他知道某人已經向70個人借了錢，會不會借給他？老友的答案當然是不會，因為問人借錢的人在借錢之後，會話千祈唔好同其他人講，否則會影響他的信譽，即是影響日後還錢給閣下，到那時候，債主已經處了下風，當然唔敢同其他人講，就算有人問都唔會承認，是否很奇怪？不過，這就是解藥。

在我初出道時，有人問我借錢，我話冇問題，只有一個條件，就是搵一個雙方都認識的人做見證，不是擔保人，對方聽完之後話咁麻煩，唔借喇。

老友問就係咁簡單？的確係咁簡單。不過，一定要在借錢之前講明，在借錢之後，債仔一定唔同意，甚至會變成唔還錢的藉口。